„Mahallada duv-duv gap“ filmidagi voqealar Toshkentning eski qismida zamonaviy binolar qurilayotgan bir paytida sodir boʻladi. Filmda sodda, anʼanaviy ota-onalar bilan ularning zamonaviy farzandlari orasidagi munosabatlar mahorat bilan tasvirlangan. Film uchun ssenariy boshida rus tilida yozilgan. Ammo Shuhrat Abbosov filmni oʻzbek tilida olishni istagan. Tasvirga olish boshlanishidan bir kun avval Abbosov mashhur oʻzbek yozuvchisi Abdulla Qahhordan ssenariyni oʻzbek tiliga tarjima qilib berishini iltimos qilgan. Abdulla Qahhor oʻsha paytda shifoxonada davolanayotgan boʻlgan. U ssenariyni shifoxona qarshisidagi oʻtirgʻichda oʻtirib ikki soatda tarjima qilgan. Abdulla Qahhor filmning oxirida tarjimon sifatida aytib oʻtilgan.